Urdu & Hindi Stories - Stories.pk
http://www.stories.pk/urdu-hindi/

ANUNAY
http://www.stories.pk/urdu-hindi/anunay-t12958.html
Page 1 of 1

Author:  Sonia [ Thu Jul 22, 2010 3:36 pm ]
Post subject:  ANUNAY

Grishm kaal ki is ritu mein

Saawan ban kar aajaao tum

Mere man ki pyasi dharti par

Ek baar umad kar barso tum

Woh meethi si nirmal anubhooti

Tan man par bikhara do tum

Kayee saawan aaye, na barsa koi

Ek baar to kripaloo ho jao tum

Ret ki bunjar dhra hai ye

Sneh ke jal se seencho tum

Sheetal jal ki woh phoohaar

Ek baar is trishhit ko de do tum

Dhalti shaam, phir ghanghor andhera

Chandrama ban kar cha jao tum

Shool kayee hein is raah mein

Ek baar to pushpit kar do tum

Tej dhara, beech bhanwar hai naav

Taarak ban kar aa jao tum

Mere is nishchal anunay ko

Ek baar to sweekaro tum

Pratikshaa ke yeh bojhil kshan

Bhujhey man ki aas ban aa jao tum

Sheethil deh hai, sthir hai lochan

Ek baar sanjeevani ban aa jao tum

Maan-mandir veeraan pada hai

Moorat ban kar bas jao tum

Mere maan ke soone aangan ko

Ek baar to harit kar jao tum

Patthar bani khadee Ahilyaa

Uddhaar karne aa jao tum

Shabri bhi to raah tak rahi

Ek baar Ram ban kar aa jao tum.

~Soni~

Page 1 of 1 All times are UTC + 5 hours
Powered by phpBB © 2000, 2002, 2005, 2007 phpBB Group
http://www.phpbb.com/